Su qədər ömrünüz olsun...

3 oktyabr 2007-ci il. Bu tarix Qaraçay Cek sakinlərinin yaddaşında uzun müddət silinməyəcək bir iz qoydu.

3 oktyabr 2007-ci il. Bu tarix Qaraçay Cek sakinlərinin yaddaşında uzun müddət silinməyəcək bir iz qoydu. Həmin gün Qaraçay Cek icması bir il yarım müddətində icma inkişafı prosesi sayəsində əldə etdiyi uğurların hesabat gününü yaşayırdı. Belə ki, icma ABŞBİA-nın maliyyə dəstəyi ilə CHF və “Ümid” HSDM tərəfindən icra olunan İcma İnkişafı Fəaliyyəti Proqramı çərçivəsində həyata keçirilmiş “Su sisteminin bərpası” layihəsinin açılış mərasiminə toplaşmışdı. Aylardan bəri icmanın ümumilikdə göstərdiyi səy, fəallıq və inam, nəhayət ki, öz bəhrəsini verdi. Tədbirə toplaşan insanların üzlərindən fərəh və məmnunluq hissi yağırdı.

Bu sevincin digər səbəbi icma tarixində ilk dəfə olaraq yüksək səviyyəli qonaqların qarşılanması ilə bağlı idi. ABŞ Dövlət Departamenti, ABŞBİA nümayəndələri mərasimdəiştirak etmək məqsədilə icmaya təşrif buyurmuşdular. Bundan əlavə, iyul ayında kənd sakinləri ilə görüş keçirmiş Milli Məclisin deputatı Lalə Abbasova, CHF və “Ümid” HSDM rəhbərliyi də icmanın sevincinə şərik olmaq üçün mərasimə gəlmişdilər. Qonaqlar layihənin yerləşdiyi ərazidə təşkil edilmiş tədbirə qatılmış, İcma İnkişaf Şurası və sadə kənd sakinlərini qazandıqları nailiyyətlərə görə təbrik edərək gələcək işlərində müvəffəqiyyətlər arzulamışdır.

150 ildən artıq tarixə malik olan 560 nəfər əhalinin məskunlaşdığı Qaraçay Cek kəndi rayon mərkəzi Xaçmazdan 14 km-lik məsafədə yerləşir. İcma ABŞ BİA-nın İcma İnkişafı Fəaliyyəti layihəsinə 2006-cı ilin may ayından cəlb edilmişdir. Ötən aylar ərzində icma inkişafı istiqamətində icma üzvləri və seçilmiş İcma İnkişaf Şurası müxtəlif mövzuda təlim və həftəlik görüşlər vasitəsilə təşkilati bacarıqlar əldə etmiş, qısa müddət ərzində sosial-iqtisadi infrastrukturun yaxşılaşdırılması istiqamətində ümumi dəyəri 22 811,92 AZN olan (CHF– 15 010,2 AZN; icma -7 801,72 AZN) “Kənddaxili yolların təmiri” və “Su sisteminin bərpası” layihələrini uğurla həyata keçirməyə müvəffəq olmuşlar.

Bu prosesdə seçilmiş İİŞ üzvləri öz bacarıqlarından müstəsna dərəcədə istifadə etmişdir. İcma isə bütövlükdə layihələrdə töhfə şəklində iştirakını təmin etmək məqsədilə İcma Fondu yaratmış, öz maddi, material, iş qüvvəsini səfərbər etmiş və fəaliyyət planını hazırlamışdır.

İİŞ üzvü Zinyət xala sevincini bizlə bölüşərkən tədbir təəssüratını bu cür ifadə etdi: “Bir il bundan əvvəl bu günümüzü mənə təsvir etsə idilər, mən sadəcə buna bir xəyal kimi baxardım. Yaşımdan bəri kənddə belə canlanmaya rast gəlməmişəm. Kəndimizdə çoxlu sayda həllini gözləyən problemlər var. Bunlardan ən vacibi isə həmişə içməli su problemi olmuşdur. Bu çətinlik, xüsusən, biz qadınlar tərəfindən daha çox hiss olunurdu. Lakin bunu aradan qaldırmaq üçün kəndin maliyyə imkanları bəs deyildi. Camaat bu köməyin kənardan olacağı ümidində ikən artıq bu dəstəyə nail olduq. Ötən ilin mayından bizimlə əməkdaşlıq edən CHF və Umid təşkilatı bizi darda qoymadı. Əvvəl yol problemimizi, indi də su problemimizi aradan qaldırmağa bizə kömək etdi. Birgə işlədiyimiz vaxtdan bəri görüşlərdə aldığımız biliklər bu layihəni həyata keçiməkdə bizə yardımçı oldu. Sağ olsun cavanlarımız və qadınlarımız. Hamı bu işə bacardığı töhfəni verdi. Kimi pul ilə, kimi əmək ilə. Məncə, elə əsas qazancımız da bu camaatın birliyini, qadınların fəallığını artırmağımızdır. Çünki, bizdə qadınlar bir az qapalıdırlar. Amma indi görürsünüz buraya nə qədər qadın toplaşıb. Deməli, biz icma işi ilə ən çətin işlərdən birinə nail ola bilmişik. Bu bizi sevindirir. Bu günkü tədbir uşaqlı-böyüklü bizim yaddaşımızda qalacaq. Bu kəndimizin tarixi anlarından biridir.

Artıq biz inanırıq ki, Qaraçay Cek icması sizinlə əməkdaşlıqdan layiqincə bəhrə götürəcək və öz inkişaf yolunun yeni mərhələsinə qədəm qoyacaq. Bizim oyanışımıza dəstək olduğunuz üçün hər birinizə dərin təşəkkür edirik”.